Mia Presuna

«Sco Grischun triling n’haja ragischs in tuot il chantun ma nu sun intretschà economicamaing cun ingüna part.»

Biografia

Als 12 october 1984 sun eu nat a Scuol cul dubel vaschinadi svizzer-talian. A Guarda in Engiadina Bassa e a Milan n’haja passantà mia infanzia. Avant co cumanzar la scoulina a Domat/Ems e Cuoira nu savaiva tudais-ch. Imprender davopro tudais-ch es stat üna lecziun fundamentala: Discuorrer ün cun tschel voul dir tadlar, incleger – e esser svessa inclegiantaivel. Uschè as fabricha punts ün cun tschel. Quai m’ha fuormà. Fingià bod n’haja realisà cha la trilinguità e la diversità culturala da mia famiglia es üna furtüna.

Eu n’ha frequentà la scoula primara ed il gimnasi a Cuoira, ingio ch’eu sun creschü sü insembel cun meis genituors e meis frar. A l’università da Turich n’haja stübgià istorgia, istorgia da l’economia ed istorgia sociala sco eir filosofia e fat il licenziat. Daspö il gimnasi n’haja investi bler temp ed energia illa lavur politica. Cun 19 ons suna gnü elet sco cusglier comünal da Cuoira e cun 24 ons sco president dal PS Grischun, cun 26 ons sco grondcusglier, cun 29 ons sco president da l’Iniziativa da las Alps, cun 35 ons sco cusglier naziunal e cun 36 sco vicepresident dal PS Svizzra. 

Sper la politica ed il stüdi n’haja lavurà sco magister auxiliar per rimplazzamaints. Per set ons n’haja lavurà sco cusgliader da strategia e comunicaziun pro l’agentura zürigaisa Feinheit SA. Hoz sun eu aint il cussagl administrativ da Feinheit. Eu viv a Cuoira e a Berna cun mia duonna.

Meis hobis sun leger, viagiar, mangiar, far jogging e star insembel cun meis amis.

Mias Valuors

Construir punts e na mürs. Dar curaschi e na far temma. A quai craj eu. Sco uman, sco politiker ed eir in meis manster sco cusgliader da strategia e comunicaziun.

Cun meis ingaschamaint politic possa cumbatter daspö mia giuventüm per mias valuors. Mia visiun es üna società libra, güsta e solidarica chi protegia nossa natüra e respetta cun quai las generaziuns futuras.

Patria es per mai il lö ingio chi’s sainta bain. Cun quai ch’eu am saint bain bod dapertuot m’incleg eu eir sco cosmopolit. Ma in meis cour sun eu ün Grischun europeic cun ragischs in Engiadina ed in Italia.

In Svizra predscha nos patrimoni progressiv e liberal daspö il 1848, la diversità culturala, nos stadi social e il bun servezzan public. Quai chi’m disturba es nossa debla conscienza europeica e nossa protecziun da l’ambiaint insufficiainta.

La Svizra ha ün nosch avegnir sch’ella fabricha mürs. Scha la clicca dals raps as fa valair sün cuosts da la populaziun. Scha profits persunals sun plü importants co üna sana natüra. O scha ün pêr pussants pretendan per sai svessa e lur amis privilegis e traplignan al listess mumaint sün umans chi nu pon apaina as dostar.

Website by pr24 GmbH, Graubünden