Il citat plü cuntschaint dal pled d’inauguraziun dal president dals Stadis Units John F. Kennedy tgnü il 20 schner 1961 es sgüra: “Ask not what your country can do for you; ask what you can do for your country.” Üna frasa chi rapreschainta il spiert voluntaristic ed il sentimaint patriotic american da quel temp.

Per üna visiun dal Rumantsch dal 21avel tschientiner dovraina prüma da tuot ün nouv spiert voluntaristic ed emanzipatoric. Nus nu stain dumandar che cha la Svizra po far per la Rumantschia. Nus stain dumandar che cha la Rumantschia po far per la Svizra. Il focus nu sto esser sün las aspettativas cha nus sco minorità vain invers la cumünanza collectiva da nos pajais. Ma sün las prestaziuns cha nus sco Rumantschia, sco minorità linguistica e culturala viva e dinamica, pudain spordscher a tuot la Svizra e magara eir a l’Europa. Uschea ans pudaina finalmaing emanzipar da nossa rolla sco “pet of the nation” cul uschedit “jööö-effect” e sviluppar üna rolla dad expertas ed experts da la diversità.

Nos know how sco viver e render consciaintas identitats multifaras distintas in üna società moderna. Nossa capacità da congiundscher tradiziun ed innovaziun sainza esser ideologics. Nos interess per e nossa solidarità cun otras minoritats. Ün spiert patriotic ma na naziunalistic. Quai sun tenor mai las prestaziuns fundamentalas cha nus Rumantschas e Rumantschs pudain metter sül plat da la balantscha per üna Svizra plü averta invers al diversità, per üna Svizra plü solidarica cun tuot las cumünanzas culturales ed üna Svizra plü consciainta da sia richezza culturala.

Scha nus sco Rumantschia fain quist müdamaint da perspectiva e creain üna nouva mentalità collectiva emanzipada eschna eir plü ferms per cumbatter per nos drets constituziunals sco minorità linguistica e culturale in Svizzra.

Abstract dal referat alla ocurrenza da la Pro Svizzra Rumantscha “(No) future per il Rumantscha?” aint il ambit da las festivitats 100 ons Lia Rumantscha.